Nagsaka pa ang numero sang patay bangud sa dengue sa Bacolod City subong nga tuig.
Sa pinakaulihi nga data nagikan sa Bacolod City Health office, nagdangat na sa tatlo ang patay bangud sa dengue sa ciudad humalin sang bulan sang Enero kag lunsay menor de edad ang mga ini.
Pinakaulihi sa mga napatay ang duha ka tuig nga babayi nagikan sa Barangay Granada nga nagtaliwan sa Corazon Locsin Montelibano Memorial Regional Hospital sadtong Hunyo 24.
Magluwas diri, isa man ka 13-anyos nga lalaki nagikan sa Barangay Tangub ang napatay sadtong Hunyo 4; kag isa ka 13-anyos nga babayi ang ginbawian sang kabuhi bangud sa dengue sa Barangay Handumanan sadtong Enero 23.
Santo sa monitoring sang CHO, naglab-ot na sa 477 ang dengue cases sa Bacolod humalin January 1 tubtub June 22.
Ini ang mas mataas sang 65 percent kun ipaanggid sa pareho nga period sadtong tuig 2018.
Suno kay Dr. Grace Tan, pinuno sang environment and sanitation division sang CHO, kuntani magbinuligay ang mga pumuluyo sa paglimpyo sa palibot agud indi magdamo ang lamok kag indi na paghulaton nga ideklarar ang dengue outbreak sa Bacolod.
