Patay ang 20 anyos nga Grade 11 student matapos ginsulod sa iya mismo kwarto kag ginluthang patay sa Granada Heights Subdivision sa Barangay Granada, Bacolod City kapin alas-7:00 kagab-i.
Sa interview sang Bombo Radyo Bacolod kay Police Captain Portia Nillosan, station commander sang Bacolod Police Station 5, ang biktima ang ginkilala nga si Nicus Balagusa.
Ini ang nagahampang sa bilyaran sa gwa sang ila balay sang hinali nga nagdulog ang pula nga Toyota Vios kag naggwa ang duha ka lalaki bitbit ang armas luthang.
Matapos makita nga may armas-luthang, gilayon man nga nagdalagan ang estudyante pasulod sa ila balay kag nagderetso sa kwarto agud manirado kag ginpatay sini ang suga.
Apang ginsundan ini sang suspetsado kag ginsipa ang piertahan sang kwarto tubtob nga mabuksan.
Sang mapasiga sang suspect ang suga, gilayon sini nga ginluthang ang biktima sang apat ka beses sa dughan kag paa.
Yara man sa kwarto ang mga ginikanan sang estudyante, kag nakilal-an sang amay sang biktima ang suspetsado nga ang 45 anyos nga amay sang abyan nga babayi sang iya nga bata.
Ang suspetsado ang positibo man nga ginkilala sang isa pa ka menor de edad nga witness.
Wala naman sang may nahimo ang ginikanan bangod nagahupot sang armas luthang ang suspetsado.
Narecover sa crime scene ang tatlo ka basiyo sang cal. 45 pistol kag duha ka slug.
Sa karun wala pa matumod ang rasun sa pagpangluthang samtang nagapabilin naman nga at large ang supect.
Magluwas sa nakilala nga suspect, ginatumod paman ang identity sang tatlo ka iban pa nga nagserbe nga look-out.
May-ara man sang nacapture nga CCTV footage gikan sa bahin sang bilyaran.
Sa karun padayun pa ang imbestigasyon sang Bacolod Police Station 5 sa kaso kag padayun man ang pagpangita sa ginatudlo nga suspetsado.
