22 ka mga persona ang nagkalamatay sa isa ka sunog nga nagluntad sa isa ka lithium battery plant sa South Korea kun sa diin kalabanan sa mga casualties ang Chinese nationals.
Masobra 100 ka mga persona ang nagatrabaho sa factory sang nabatian sang mga trabahante ang asod-asod nga paglupok nagikan sa second floor, kun sa diin gina-inspect kag ginaputos ang mga lithium-ion batteries.
Sa nasambit nga sunog, 22 ka mga persona ang nagkalamatay, lakip na ang 20 ka mga foreign nationals nga ginalakipan sang 18 ka mga Chinese, isa nagikan sa Laos kag isa nga wala pa natumod ang nationality.
Sa initial nga imbestigasyon, ang kalayo ang naglapta sa sulod lamang sang pila ka segundo kun sa diin ang toxic fumes ang madasig nga naglapta sa area.
Suno sa mga bombero, sang nagsugod ang aso nagikan sa isa ka battery part, 15 ka segundo lamang ang natabo agud macover ang bilog nga space bangud sa gilayon ng paglupok.
Ginapatihan man nga ang mga biktima ang nakahaklo sang toxic fumes sa malip-ot nga tinion kag nalipungan.
Ginbisita ni South Korean President Yoon Suk Yeol ang disaster site sang Lunes kag ginmanduan ang mga otoridad nga tsekyaron ang mga kaangay nga factories nga maghimo sang tikang agud malikawan ang mga aksidente nga matabo liwat.
