Patay ang 26 anyos nga lalaki matapos ginluthang samtang yara sa computer shop sa Purok Lampirong, Barangay 2, ciudad sang Bacolod kapin alas-7:00 kagab-i.
Ang biktima ang ginkilala nga si Benjo San Jose, 26 anyos, single, wala sang trabaho kag residente sang nasambit nga lugar.
Sa interview sang Bombo Radyo Bacolod kay Alias Abby, isa sa mga witness, may anom ka persona nga nagahampang sa computer shop sang mag-abot ang tatlo ka suspetsado.
Suno diri, isa sa ila ang nakabonnet samtang nakahelmet naman ang duha.
Ginsaway pa sang isa sa mga suspect ang isa ka bata nga magpahigad kag didto na sunod-sunod nga ginluthang ang biktima.
Yara man sa computer shop ang utod kag asawa sang utod sang biktima.
Samtang sa interview sang Bombo Radyo Bacolod sa manghod sang biktima, gindala pa sa ospital si San Jose, apang pahayag sang doktor nga ini ang wala na sang heart beat sang yara pa lamang sa crime scene.
Aminado man ini nga napriso na sadto ang iya magulang apang ini ang madugay na kag wala man ini nakahibalo kun sa ano nga kaso.
Suno sa manghod, wala man nakabatun sang pagpamahog ang iya magulang kag indi man nila kilala ang mga suspetsado.
Sa imbestigasyon sang Bacolod Police Station 2, ang biktima ang ginakabig nga drug personality kag madamo man ini sang police records kaangay sang kaso sang pagpangawat.
Ini ang ginpahayag nga madamo man sang kontra bangud bisan ang tupad-balay sini ang iya ginapangkawatan.
Makapila man ini mapriso kag naglab-ot na sa punto nga inugpetisyunan na ini kuntani sang mga pumuluyo sa Purok Lampirong nga pahalinon bangud indi na maagwantahan ang iya ginahimo.
Ginhambalan man ini sang iya iloy apang nagapanindugan man ang biktima nga indi siya maghalin bisan madamo siya sang kontra bangud didto ini natawo.
