Gilayon nga gin-sunog sang African Swine Fever Task Force ang 27 ka kilo nga pork siopao nga nakumpiskar sa Bacolod-Silay Airport sadtong Dominggo nga adlaw.
Sa interview sang Bombo Radyo Bacolod sa Provincial Veterinarian Officer kag Vice Chairman sang ASF Task Force nga si Dr. Renante Decena, gin-pahayag sini nga natigayon nga nakumpiskar sang Quarantine team sang ASF task force, CAAP kag ABSICOM ang nasambit nga siopao nga gikan pa sa Manila kag iga-deliver kuntani sa isa ka kalan-an diri sa syudad sang Bacolod kag gilayon naman nga gin-sunog sa sulod sang drum.
Suno kay Decena, hugot nga gina-dumilian sa subong sang ciudad sang Bacolod kag probinsya sang Negros Occidental ang pag-pasulod sang mga pork meat products ilabi na kun gikan sa Luzon matapos may nag positibo nga baboy sa ASF.
Nalakip sa banning sang executive order sang probinsya ang tanan nga mga pork and buy products, manufactured canned goods nga may pork origin, kag live pigs sa sulod sang 90 days.
Nakigsapol naman si Decena kay Governor Eugenio Jose “Bong” Lacson agud panilagan ang estado sang deklarasyon kun mangin epektibo ang 90 days banning.
Dugang pa ni Decena, kun indi pa sigurado nga mahilway ang seguridad sang Visayas kag Mindanao sa ASF nga lapnagon karun sa Luzon, posible nga maga-extend sila sa pag-ban sang mga pork meat products.
Samtang, maga-patigayon naman subong nga adlaw ang ASF task force sang checkpoint sa ciudad sang Kabankalan agud i-monitor ang mga shipment nga gikan naman sa probinsya sang Negros Oriental.
