Nagapadayon pa ang imbestigasyon sang kapulisan tuhoy sa motibo sang pagpangluthang patay sa isa ka 29-anyos nga babaye samtang nagasakay ini sa tricycle sa South Capitol Road, Barangay 8, Bacolod City, pasado alas 7:00 kagab-i.
Sa interview sang Bombo Radyo kay Police Lt. Andy Ofalia, deputy station commander sang Bacolod Police Station 2, nagikan sa 888 China Town Square si Medelyn Benignos, 29 anyos kag residente sang Purok Lampirong, Barangay 2, Bacolod City kag nagsakay sa depampasahero nga tricycle.
Nahibaluan nga may ginapanag-iyahan ini nga baligyaan sa nasambit nga mall.
Suno kay Ofalia, tatlo sila tanan sa tricycle kun sa diin isa ang driver, nagaangkas diri ang iya asawa kag yara sa side car si Benignos.
Sang yara na sa dalan sa atubangan sang Ayala Malls Capitol Central ang tricycle, hinali lang ini nga ginpalipatan sang riding-in-tandem suspects kag ginluthang sa ulo ang biktima.
Bangud sa kahadlok sang mag-asawa pagkabati sang lupok nagdalagan ang mga ini.
Nakaangkon si Benignos sa patal nga pilas sa ulo nga gintunaan sang iya kamatayon.
Gilayon naman nga nakapalagyo ang mga suspetsado.
Nakuha sa crime scene ang duha ka fired cartridge case kag duha ka slug sang wala pa maidentify nga calibre.
Gindala naman sa punerarya ang bangkay sang biktima.
Suno kay Ofalia, nagapadayon pa ang ila imbestigasyon tuhoy sa identity sang mga suspetsado kag motibo sang krimen.
