Ginbantayan sang mga pumuluyo sa ciudad sang Bacolod ang masandukot nga debate sa tunga sang mga kandidato sa pagka-congressman sa nagahilapit nga 2019 midterm elections.
Sa ginpatigayon nga Debate sa Bombo, nag-atubangay sanday incumbent Congressman Greg Gasataya, former congressman Monico Puentevella kag Dr. Jan Kevin Moises.
Ginsabat sang tatlo ka mga kandidato ang pila ka mainit nga issue nga ginaatubang sang pungsod kag ano ang ila mahimo bilang miyembro sang Kamara kaangay sang pagbuhi sang death penalty, legalization sang medical marijuana, nagalala nga problema sa iligal nga druga kag problema sa tubig kag iban pa, agud mahibaluan ang ila panindugan.
Ginhatagan man sang tsansa ang mga kandidato nga maghaboy sang pamangkot sa isa kag isa kag may mga pamangkot man ang mga supporters sang magtimbang nga kampo.
Ang Debate sa Bombo ang gintambungan man sang tiglawas sang nagkalain-lain nga sektor sa sosyodad kalakip na ang acting election officer sang Bacolod nga si Atty. Janette Lamban, Parish Pastoral Council for Responsible Voting kag tiglawas sang media.
Ang una nga hugnat sang debate ang naglawig sang masobra isa ka oras kag tunga.
Gilayon man nga nagpirma sang peace covenant ang tatlo ka mga kandidato.
Nagbantay man sa idalom sang estasyon ang mga supporters sang tatlo ka mga kandidato.
Mansig plastar ang mga kandidato sa pagka-congressman sa lone district sang Bacolod sang ila mga plano sa tion nga sila ang mabutang sa posisyon.
Ginpahayag ni former congressman Monico Puentevella nga plano niya nga himuon nga duha ang distrito sa ciudad sang Bacolod bangud dako na gid ang populasyon.
Igaduso man ni Puentevella nga ibalik ang Negros Island Region nga ginbungkag ni Presidente Rodrigo Duterte sang tuig 2017 matapos ang duha ka tuig nga pag-eksister sini.
Nagpanindugan man ang anay congressman nga indi niya luyag ang pagpatindog sang coliseum kundi ang kaugalingon nga ospital sang ciudad.
Bilang isa ka doktor, magasentro naman si Jan Kevin Moises sa healthcare sang mga pumuluyo sa tion nga siya ang mapilian nga kongresista.
Nagpanindugan man si Moises nga tion na gid agud makaangkon sang kaugalingon nga ospital ang Bacolod agud indi pagpinagutok ang mga pasyente sa Corazon Locsin Montelibano Memorial Regional Hospital.
Luyag man sini nga ma-integrate sa mga barangay ang healthcare agud diri pa lang, may available na nga bakuna para sa mga pumuluyo.
Ginpabugal naman ni incumbent Congressman Greg Gasataya ang pagtutok niya sa edukasyon sa sulod sang manug-tatlo ka tuig nga pagpungko bilang kongresista.
Magluwas sa edukasyon, gintutukan man ni Gasataya ang ikaayong-lawas bangud bilang naghalin sa simple nga pamilya, naeksperyensyahan sini ang kabudlayan sa tion nga wala sang inugbayad sa ospital.
Ginapakamaayo man sini nga magtutok sang trabaho nga mahipos.
