BACOLOD CITY — Padayon pa nga ginahibalo kun pila ka mga kabalayan ang nahalitan sang buhawi nga naglabay sa banwa sang Valladolid kagab-i.
Sa impormasyon nga nakuha sang Bombo Radyo Bacolod kay Senior Inspector Junjie Liba, hepe sang Valladolid Municipal Police Station pasado las 7:00 kagab-i sang nagpangdalasa ang buhawi, una sa Purok Gumamela Brgy. Guintorilan.
Tatlo ka mga balay ang kumpirmado nga nagkalaguba sa nasambit nga lugar nga ginapanag-iyahan ni Jonathan Samera, ang balay man sang iya manghod nga si Ruth Samera kag sang ila pakaduha nga si Michael Mindanao.
Suno naman kay Jonathan Samera tuman kabaskog nga hagunghong sang hangin ang ila nabatian nga naglabay sa ila balay nga gintunaan sang pagkaguba sini kag paglinupad sang ila kagamitan sa wayang.
Si Jonathan ang utod sang punong barangay sang Brgy. Guintorilan nga si Joel Samera.
Kagab-i, nagpasalig naman ini nga iya sapulon ang barangay council agud lantawon ang mahimo mabulig sa mga naapektuhan
Gintsekyar man sang team ni Senior Inspector Liba ang Barangay Batuan kag Ayungon bangud may report nga may pila man ka balay nga nagkalaguba diri.
Sa impormasyon nga nakuha sang Bombo Radyo may yara man sang 7 ka mga balay nga naguba bangud sang nasambit nga buhawi sa Brgy. Sagasa ciudad sang Bago.
