Nagapadayon sa paghimakas sa pagbiyahe ang isa ka traditional jeepney driver apisar sang nagasaka nga presyo sang produktong petrolyo.
Sa interview sang Bombo Radyo Bacolod kay Christopher Alegre, jeepney driver nga gikan sa Escalante City, nga anum na ka tuig ini nga nagabiyahe sang jeep sa Bacolod City kag sa karun doble na ang ginsaka sa presyo sang gatong.
Suno kay Alegre, wala na ini sa karun nagapadalagan kaangay sang pagpadalagan sini sang tinalikdan nga indi pa tuman kamahal ang presyo sang gatong agud makakinot.
Suno diri, bisan pa mahal ang ginatughong sini nga gatong magapadayon ini sa paghimakas sa pagbiyahe agud may income.
Ginpahayag naman sang isa ka driver sa modernized jeep nga may yara na sang nag-untat sang pagbiyahe bangud nagarenta lamang ang mga ini sang unit nga ila ginabiyahe.
Suno kay Eyadinio Caburog, Modernized Jeepney Driver, ginpili nalang sang iban nga mag-untat sa pagbiyahe bangud ang ila nga ginakita sa pagbiyahe ang nagakadto lamang sa gatong.
Suno kay Caburog, nag-adjust man ang sweldo sini bangud nga tuman ka mahal ang presyo sang gatong.
Suno pa diri, free wheeling ang isa ka diskarte sini sa pagpadalagan sang salakyan agud nga indi mahakog sa gatong ang ginadala nga salakyan.
Nagapasalamat man ini sa mga pasahero nga makaintsindi kag wala na ginakuha ang kambiyo.
Magapadayun gihapon sa pagbyahe ang pila ka Jeepney driver apisar nga may tion nga P70 na lamang ang mapauli sa pamilya.
Sa interview sang Bombo Radyo Bacolod kay Joseph Lozada, driver sang traditional jeepney nga may routa nga Manadalagan-Libertad, sadto P900 ang ila nga ginatughong sa kada adlaw, apang sa karun ini ang nagadangat na sa masobra P2,700.
Sa kada adlaw, yara na lamang sa P100 tubtob P200 ang ila mapauli, apang kun mahina gid ang byahe, may tion nga nagpauli na lamang ini sang P70.
Pahayag sini nga indi nagid sa karun masarangan nga mapalab-ot sa P300 ang ila nga income sa kada adlaw.
Suno kay Lozada, apisar sa tuman nga pagnubo sang ila kita, kag sa padayun pa nga pagsaka sang presyo sang gatong, sila ang magapadayun gihapon sa pagbyahe para sa ila nga pamilya.
Panindugan sini nga luyag nila nga buhion ang ila pamilya sa matarong nga trabaho apisar nga gamay ang income, sangsa sila ang mangawat.
