Arestado ang isa ka 30 anyos nga US citizen nga lalaki matapos maaktuhan nga nagavandalize sang mga pader sa Burgos Street, Barangay Villamonte kahapon sang hapon.
Sa interview sang Bombo Radyo Bacolod kay Police Lt. Col. Sherlock Gabana, pinuno sa Mobile Patrol Unit sang Bacolod City Police Office (BCPO), ang suspetsado amo si Jean Clifford Rabinowitz, nga ginakilala bilang “Vandal Bandit of Bacolod City” ang single, unemployed kag temporaryo nga nagapuyo sa Rosario Heights, Barangay Taculing, Bacolod City.
Ang suspetsado ang naaktuhan mismo nga nagapang spray paint sa mga pader samtang nagapatrolya ang Task Force Anti-Vandalism sang BCPO.
Narecover sa paghinakop sini ang 13 ka canisters nga may nanarisari nga kolor.
Sang arestuhon na kuntani, si Rabinowitz ang nagbato pa sa mga otoridad.
Suno kay Gabana, ginpahayag sang suspetsado nga hobby sini ang paghimo sang graffiti sa mga pader.
Nahibaluan nga mismo si Bacolod City Police Office (BCPO) Director Police Col. Noel Aliño ang nagtanyag sa paghatag sang P5,000 nga reward sa mga makatudlo sang mga nagapatigayon sang vandalism sa ciudad sang Bacolod.
