Wala na sang kabuhi sang masapwan ang isa ka babayi nga wala na sang pang-idalom nga panapton sa Sitio Kapasyanon, Barangay Sicaba, Cadiz City pasado alas-5:00 kahapon sang hapon, Mayo 21.
Ginkilala ang biktima nga si Jenny Ann Delano, 38-anyos kag residente sang nasambit nga lugar.
Sa interview sang Bombo Radyo kay PLTCOL Lymel John Pasquin, hepe sang Cadiz City Police Station, nasapwan ang bangkay nga yara sa kapin 20 metros ang kalayuon humalin sa sementado nga dalan kag malapit lamang sa ila puluy-an.
Sa inisyal nga imbestigasyon sang Cadiz PNP, pasado alas-12:00 sang udto sang ginbilin sang bana ang iya asawa sa waiting shed agud magpa-gas apang sa iya nga pagbalik, wala na ini sa waiting shed.
Sa ila nga pagpangita kaupod ang iya nga bata, una nila nga nakit-an ang tsinelas sang iya asawa antes nasapwan ang bangkay sini malapit sa dalan.
Suno kay Pasquin, may yara sang pilas sa ulo sang biktima kag may yara man sang mga senyales sang strangulation.
Narekober naman sa lugar ang sling bag sang biktima nga ginapatihan gingamit sa pag-strangulate sa iya, samtang ang pilas sa ulo ang posible bangud ginlampusan ini ukon natumba.
Pahayag ni Pasquin, isa sa mga ginalantaw nga anggulo amo ang posible nga paghimulos, ukon ini ang may kaangtanan sa plano sang biktima nga mag-withdraw kuntani sang kwarta sa COOP antes natabo ang insidente.
Sa karon, ginahulat pa sang kapulisan ang findings sang forensic examination agud matumod ang gintunaan sang kamatayon sang biktima.
