Patay ang isa ka amay matapos ang gina-alegar ginsumbag sa iya nga ulo sa syudad sang San Carlos.
Sa interview sang Bombo Radyo Bacolod kay Police Staff Sergeant Efepanio Mercado, imbestigador sang San Carlos City Police Station, las-9:00 sang aga sadtong Miyerkules, Mayo 29 sang nasapwan ang biktima nga ginkilala kay Jomelito Alboro, 39 anyos sa puluy-an sini sa Poso 3, Hacienda San Jose, Barangay Guadalupe sa amo nga syudad.
Base sa imbestigasyon sang mga kapulisan, Mayo 27, duha ka adlaw antes napatay ang biktima, nakit-an pa ini nga nag-inum sa isa ka videokihan upod ang isa sini ka abyan nga amo karun ang suspetsado sa natabo nga krimen.
Madamo ang nakakita nga ang biktima ang ginsumbag sa iya ulo bangud sila ang nag-baisay sang iya upod bangud naman sa kahulugbon.
Suno sa nakasaksi, matapos ginsumbag sa ulo si Alboro, nakabunggo pa gid ini sa isa ka matig-a nga bagay.
Base naman sa naggwa nga resulta sang medico legal, nagka-internal bleeding ang bitkima rason sang iya nga kamatayon.
Nahibaluan nga si Alboro ang may Internal Hemmorage rason nga nag-trigger ini sa pag-sumbag sa kag pagkabunggo sang iya ulo sa matig-a nga bagay.
