Nagpanugyan ang Negros Occidental Police Provincial Office (NOCPPO) sa mga ginikanan nga tudloan ang ila mga kabataan nga indi magsalig sa mga indi kakilala.
Madumduman nga duha ka separado nga insidente sang pagmolestiya ang natabo sa ciudad sang Bago kag banwa sang EB Magalona kun sa diin lunsay mga babayi nga menor de edad ang biktima.
Sa interview sang Bombo Radyo kay PMaj Judesses Catalogo, Spokeperson sang NOCPPO, nagapabata ang biktima sang pangmolestiya ukon panghimulos kun sa diin ginlantaw sini nga ginakuha sang mga suspect ang pagsalig sang mga menor de edad.
Gani suno kay Catalogo, dapat pag edukar sang mga ginikanan ilabi na ang may mga kabataan nga babayi nga indi magsalig sa indi kilala.
Dugang pa, dapat indi man pagtugutan nga may magdul-ong kag sugat nga iban sa ila mga kabataan sa eskwelahan.
Sa kaangot nga balita, ginpahayag ni Catalogo nga estable na ang kahimtangan matapos maoperahan ang Grade 4 pupil nga ginlamposan sang bato kag ginhimuslan sa ciudad sang Bago sang Oktubre 1.
