Ginpasalig sang tagpamaba sang 3rd Infantry Division sang Philippine Army nga magasunod sila sa ano man nga desisyon sang Korte Suprema angot sa legalidad sang Anti-Terrorism Act.
Madumduman nga nagpatigayon sang oral arguments kahapon sa SC nga ginpangunahan ni Chief Justice Diosdado Peralta ang en banc hearing, kun sa diin si Solicitor-General Jose Calida ang nagpamuno sa gobyerno para depensahan ang legalidad sang layi batok sa pito ka mga mamalidha nga nagakwestyon sa layi.
Kabug-usan nga 37 ka mga petisyon ang ginfile batok sa layi.
Kalabanan sa mga petisyon ang nagahingyo sa Korte Suprema nga mag-issue sang restraining order sa pagpatuman sang layi kag pag-draft sang Implementing Rules and Regulations.
Sa interview sang Bombo Radyo Bacolod kay Army Major Cenon Pancito III, ginpahayag sini nga ila ginatugyan sa Korte Suprema ang desisyon kag magasunod lamang sila.
Apang nagalaom ini nga iga-uphold sang SC ang legalidad sang anti-terror law bangud nagapati si Pancito nga nag-agi ini sa husto nga proseso.
Ginpasalig man sang tagpamaba ang publiko nga indi nila pag-abusuhon ang layi kag ila lamang ini ipatuman santo sa wisdom kag purpose sini.
Nahibaluan nga sa idalom sang anti-terror law, sarang maaresto ang isa ka suspected terrorist bisan wala sang warrant kag sarang ini mapriso tubtob 24 ka adlaw.
