Patay ang apat ka tuig nga bata nga babayi matapos natumbahan sang goalpost ukon ang dako nga salsalon nga gina-pasudlan sang bola kun maghampang sa football sa syudad sang Silay.
Ginkilala ang biktima kay Regine Gumban, residente sang Purok Sawmill, Barangay Guinhalaran kag manug-kinder na kuntani sa sini nga tuig.
Sa interview sang Bombo Radyo Bacolod sa amay sang biktima nga si Ronelo Gumban, makuha kuntani sang bulak ang iya bata upod ang 6 ka iban pa nga mga kabataan agud ihalad sa Flores de Mayo, apang naghapit ang mga ini sa ginatawag nga Grandstand PLDT sa diin natabo ang aksidente.
Ginkabitan sang mga kabataan lakip na ang biktima ang goalpost sang hinali na lang ini natumba kag napilpilan sa dughan si Regine.
Sang ginlawag naman sang katikista ang pangalan sang mga kabataan, didto na nahibaluan nga may natabo na nga aksidente.
Gilayon nga ginkadtoan sang katikista ang mga kabataan kag ginhakwat ang biktima sa diin nagsugat-anay sila sang amay kag gilayon nga gindala sa ospital sa syudad sang Bacolod ang 4 anyos apang ini ang ginbawian sang kabuhi bangud sa internal hemorrage.
Nahibaluan nga ang goalpost ang wala nalubong sang hugot sa duta rason nga madasig ini matumba kun kabitan.
Nag-panawagan naman ang amay sang biktima sa tag-iya nga buligan sila sa inuggasto agud mapalubong sang pormal ang 4 anyos sini nga bata.
