Ginahulat na lang nga may koneksyon na sang kuryente kag tubig sa bag-o nga public market sa ciudad sang Talisay apang tanan nga vendors dapat nakasaylo na sa katapusan sang bulan.
Sa interview sang Bombo Radyo kay John Tirthdas, Talisay City Public Supervisor, maumpisa na ang tanan nga vendors sa pagbaligya sa bag-o nga merkado sa Hunyo 1, 2026.
Suno diri, ginahulat na lang ang koneksyon sang Negros Electric and Power Corporation (NEPC) kag water supply apang ready na ang tanan.
Suno kay Tirthdas, halos tanan nga vendors mahatagan sang ila bloke kag may service bus para sa mga vendors agud indi mabudlay sa ila ang pagsaylo.
Apang, may service bus man para sa mga vendors kag customers nga mahulat sa bahin sang Capt. Sabi Street kag ini mabyahe kada 30 minutos ukon kun mapuno na ang bus.
Ini agud mas mahapos sa ila nga magpadulong sa bag-o nga merkado.
Suno kay Tirthdas, mataas ang renta sa bag-o nga public market apang libre ang transfer fee kag renta sa sulod sang isa ka tuig para sa mga old vendors.
Apang, sa masunod nga tuig mabayad na sang 35 percent nga rental ang mga vendors kag 50 percent naman sa sunod pa gid nga tuig.
Pahayag ni Tirthdas, ginalauman nga ang market mangin kaangay nga mall kag ini makabig nga isa sa mga best nga merkado sa Negros.
