Nahatagan na sang special permit ang 42 ka mga ambulant vendors sa North Capitol Road, Bacolod City.
Ini ang pormal nila nga nabatun sa City Administrators Office.
Apang antes ginhatag ni Bacolod City Mayor Greg Gasataya ang special permits, ginpaseguro anay sini sa mga vendors nga matuman nila ang mga requirements sang ciudad.
Kalakip na diri ang pagpabilin sang katinlo sa palibot.
Kasubong man ang mga pagsulundan nga wala sang magatukod sang permanent structure kundi mga go-carts lamang, kasubong man ang pagsunod nga timeline nga nakapasad sa ila nga permit.
Kalabanan sa mga ini ang ginapahanugutan nga makabaligya halin alas-4:00 sang hapon tubtob alas-10:00 sang gab-i.
Ang special permits ang kinahanglan irenew kada duha ka bulan.
Suno kay Mayor Greg, kasunod sang paghatag sang special permit, mangin mahapos naman para sa ciudad nga mapalab-ot sa mga vendors ang mga pahanumdom kag bulig.
Pahayag sang alkalde, pauna lamang ang special permit, kag kasunod sini ang ciudad ang mahimo mag-offer man sang kooperasyon sa pagpabilin sang katinlo sa lugar, kasubong man ang pag-offer sang livelihood assistance ukon capital sa negosyo, improvements, kag go-carts kun may available.
