Narekober ang kapin P1,000,000 nga balor sang suspected shabu nga nasulod sa balde sang biskwit matapos ginsurrender mismo sang pamilya sang suspek sa mga kapulisan.
Antes pa sini, una na nga nadakpan ang subject person sa ginpatigayon nga drug buybust operation sang Bacolod Police Station 8 kahapon, Mayo 27, sa diin nakuhaan ini sang ginabanta may kabug-aton nga 70 grams sang suspected shabu nga may standard drug price nga P476,000 sa Purok Burmahiko, Barangay Tangub, Bacolod City.
Ginkilala ang suspek nga si alias “Josh”, 28-anyos, wala sang trabaho, kag residente sang Purok Tahong, Barangay 2, Bacolod City.
Sa interview sang Bombo Radyo Bacolod kay Punong Barangay Cesar Rellos sang Barangay 1, nakabaton ini sang report naggikan sa iya nga kagawad, nga ang himata ni Josh ang nagapangayo sang bulig nga kadtuan ang ila balay bangud nagapati sila nga may ara diri sang droga.
Ginreport ni Rellos sa Bacolod Police Station 2 kag gilayon man nga ginpadul-ungan sang mga kapulisan.
Sa ila nga pagtsekyar sang balay, ila natukiban ang isa ka balde sang biskwit nga may unod nga ginapatihan shabu nga ginabanta nagabalor isa ka milyon kag kwarta nga P11,000.
