Malipayon nga gin-anunsyar sang 79th Infantry Battalion sang 303rd Infantry Brigade sa idalom sang 3rd Infantry Division nga may yara sang 44 Friends Rescued (FRs) ukon anay mga katapo sang rebelde nga grupo ang nakabaton sang financial assistance.
24 sa 44 ka mga anay rebelde ang nagsungka bangud man sa effort sang 79th IB.
Sa interview sang Bombo Radyo Bacolod kay 1st Lt. Dan Samoza, Civil Military Operations Officer sang 79th IB, ang turn-over sang Key Peace and Development Programs ang ginpangunahan Governor Eugenio Jose V Lacson sang probinsya sang Negros Occidental paagi sa Office of Provincial Administrator kag sa Provincial Planning and Development Office (PPDO) sang Negros Occidental.
Suno kay Samoza, ang inisyatibo ang kabahin sang commitment sang gobyerno nga supportahan ang anay mga rebelde samtang ang mga ini ang nagbalik sa sosyodad kag transistion sa mas malinong kag produktibo nga pagpangabuhi.
Kada isa sa 44 ka mga anay rebelde ang nagbaton sang P30,000 nga cash assistance.
Suno diri, ginpasalamatan sang 79th Infantry (Masaligan) Battalion sa bulig para sa assistance agud nga masustiner ang tikang nga ginahimo agud nga mabuligan sa pagbag-o sang pagpangabuhi.
Ginpahayag man sini nga mangin kabahin man ang 44 sang mahatagan sang local amnesty kun maaprubahan ang ila nga mga papeles nga ginaproseso na sa karun.
Ginpakigbahin man sini ang testimonya sang isa nga nangin emosyonal sa pagpahayag nga kuntani sadto pa lang nagsungka na ini kag nag-avail sang programa sang gobyerno nga gintalana para sa ila.
Sala man ang ginahambal sa ila nga kun magsungka ang mga ini sakiton sang tropa sang gobyerno.
Bangud man sa nabaton nga ayuda ang gin-imbetar man sang isa sa mga beneficiaries ang mga yara pa sagihapon sa makawala nga grupo nga magsungka na kag mag-avail sang ayuda.
Ginpahayag man sini nga bukas ang gobyerno nga magbaton sang tanan nga luyag nga magsungka kag mag-avail sang programa sang gobyerno nga gintalana para sa ila.
