Patay na sang nasapwan kagab-i ang 5-anyos nga babaye sa banwa sang Pontevedra matapos una nga na-missing kahapon sang hapon.
Nasapwan na lamang nga wala na sang kabuhi sa sapa ang biktima nga ginkilala lang kay Alyas Mae sa Purok Casino, Brgy. Miranda mga alas-9:00 kagab-i.
Suno sa hepe sang Pontevedra Municipal Police Station nga si Police Captain Ron Daryll Nigos, alas-2:00 kahapon sang hapon sang nagreport ang ginikanan sang biktima sa Municipal Disaster Risk Reduction and Management Office (MDRRMO) kag gilayon nag-coordinate sa kapulisan kag ginsuguran ang pagpangita diri.
Santo sa inisyal nga pag-usisa sang doktor kagab-i, nagaguwa nga suffocation ang ginkamatay sang biktima apang ginapadalman pa sang Pontevedra Municipal Police Station ang iban pa nga posible natabo sa biktima antes ini nasapwan sa sapa.
Suno sa hepe, ulihi nga nakit-an ang biktima kahapon nga may upod ini nga isa ka babaye nga ginapahayag may deperensiya sa paminsaron.
Samtang may isa pa gid ka suspetsado nga yara man sa kustodiya sang Pontevedra MPS.
Ginapasiguro sang hepe nga hibaluon nila ang madalom nga rason sa pagkamatay sang biktima kag ginahulat man nila ang opisyal gid nga resulta sa post mortem examination sa bangkay.
