Arestado ang duha ka mga kababainhan sa ginpatigayon nga buybust operation sang Police Station 1 sa Purok King Fisher, Barangay 16 ciudad sang Bacolod kaina sang kaagahon.
Dakop sanday Hezyl Ointero, 38-anyos sang nasambit nga lugar kag si Aia Sorillo, 48-anyos sang Prk. Ramon Magsaysay, Barangay 14.
Suno kay Police Major Jovil Sedel, hepe sang Police Station 1, natigayon nga makuha sa posesyon kag kontrol sang mga suspetsado ang 13 tanan ka mga heat sealed transparent plastic sachet sang suspected shabu lakip na ang buybust item.
Ginabulubanta nga nagabalor ang nasambit nga mga shabu sang 15 mil pesos.
Sa karon, yara na sa kustodiya sang Police Station 1 ang mga suspetsado kag natalana nga pasakaan sang kaso sa paglapas sang Republic Act 9165 ukon Comprehensive Dangerous Drugs Act of 2002.
Tatlo pa gid ka mga persona nga may dala ukon nagabaligya sang iligal nga drug ang nadakpan sang tatlo man ka mga police stations sa Bacolod kagab-i.
Sa Police Station 2, arestado ang motorcycle rider nga si Apollo Mendoza sang Purok Kagaycay, Barangay 2 matapos makuhaan sang ginapatihan shabu sa checkpoint operation sa likod sang provincial capitol kagab-i.
Ginflagdown sang mga pulis ang motorsiklo ni Mendoza apang nagtinguha ini nga magpalagyo.
Sang makorner na sang mga pulis, gintuyo ni Mendoza nga ihaboy ang isa ka plastic apang nakit-an ini sang otoridad kag sang gintsekyar, nagaunod ini sang pito ka sachet sang suspected shabu.
Sa Police Station 3 naman, arestado sa buybust operation sa Purok Masinadyahon, Barangay Bata si Alexander Gozon, 54-anyos sang amo nga lugar kag nakuhaan sang 35 mil pesos nga balor sang suspected shabu.
Samtang, arestado naman sang Police Station 4 si Michael Poblacion kadungan sang buybust operation nga ginpatigayon sa Barangay 19.
Si Poblacion ang nakuhaan sang duha ka sachet sang suspected shabu.
Date of airing: April 5, 2019
