Patay ang isa ka 59-anyos nga lalaki matapos ginluthang sang wala pa makilal-an nga mga suspetsado sa sulod mismo sang iya ginarentahan nga balay sa DC1, Phase 1, Regeant Pearl, Barangay Alijis, Bacolod City alas 6:30 kagab-i.
Sa interview sang Bombo Radyo kay Police Lt. Conrado Espino, hepe sang Bacolod Police Station 7, ila nasapwan nga nagahamyangon sa iya nga kwarto kag wala na sang kabuhi si Jeffrey Parandas, isa ka fixer sa Land Transportation Office kag nagapalending sang kwarta.
Si Parandas ang wala sang asawa kag mga kabataan apang may gin-adopt ini nga duha ka mga bata nga sanday Bonbon, may asawa kag duha ka bata kag hibalos sini nga si Dimple.
Suno kay Espino, tatlo ka mga persona sakay ang duha ka mga motorsiklo ang nagsulod sa balay sang biktima bitbit ang dalagko nga mga armas.
Santo naman sa pahayag ni Bonbon, pagsulod sang mga suspetsado sa balay, ginpasulod sila sa isa ka kwarto kag ginsirad-an.
May yara sila sang nabatian nga lupok nagikan sa kwarto sang amay nga sadto nagapanyapon, kag daw kaangay nga luyag abrehan sang mga suspetsado ang parador didto.
Suno sa iya, posible nga indi nila ini maabrehan gani nagwa na ang mga suspects kag ila nalang nabatian nga naglakat na ang motorsiklo.
Sang ila gintsekyar ang kwarto sang 59-anyos, nagahamyangun na ini kag may igo sang bala.
Suno sa hepe, nagapatigayon pa ang ila imbestigasyon sa kun ano ang motibo sa krimen apang suno diri, yara sa ila rekord nga under monitoring sa drugs si Parandas.
Nagpasalig man ini nga indi sila mag-untat tubtob nga madakpan ang mga suspetsado agud mahatagan sang hustisya ang natabo.
Nagapanindugan naman ang bata sang biktima nga si Bonbon nga wala sang kaangtanan ang amay sa ilegal nga druga.
Suno sa iya, ang anay naga-arkila sa ila balay amo ang imbolbado sa illegal drugs.
Suno diri, lending lang ang negosyo ni Parandas kag wala ini naga-intra sa indi maayo nga buluhaton.
