Ginakwestyon sang unyon sang mga empleyado sang Bacolod City Water District (BACIWA) ang nangin basehan sang board of directors nga i-deklarar nga redundancy ang posisyon sang 60 ka mga empleyado nga nagpabilin sa water district.
Kaina sang aga, wala na ginpasulod ang 60 ka mga empleyado nga nakabaton sang order nga ginpagwa ni Baciwa acting general manager Engr. Michael Soliva sadtong Disyembre 29, 2020.
Nahibaluan nga nakasaad sa Memorandum Order No. 2020-081 nga ginadumilian na ang 60 ka mga empleyado sang Baciwa nga magtiner sa tagsa nila ka mga opisina kasunod sang Board Resolution No. 172 nga nagadeklarar sang ila posisyon nga “Redundant” rason sang “separation of service” ukon pagkakakas sa trabaho.
Sa interview sang Bombo Radyo Bacolod kay Lenny Espina, presidente sang Baciwa employees union, ginkwestyon sini ang desisyon sang board of directors nga ideklarar nga redundancy ang ila posisyon nga ginbase lang sa opinyon sang Office of the Government Corporate Counsel (OGCC).
Suno kay Espina, ang Civil Service Commission lang dapat ang may gahom nga magdeklarar sini.
Nagpablotter naman sila sa pulis bangud nga wala sila gintugutan nga makasulod sa trabaho.
Sa karon, ginatun-an naman sang legal team sang employees union ang pagpasaka sang kaso batok sa water district.
