70 porsyento sang mga drivers sa ciudad sang Bacolod kag probinsiya sang Negros Occidental ang wala makabaton sang Pantawid Pasada card.
Sa interview sang Bombo Radyo Bacolod kay Sentrong Samahan ng Tsuper at Operators sa Negros secretary general Jessie Ortega, ginpahayag sini nga madamo karon sang mga drivers ang nagareklamo bangud wala ginhatag sang ila mga operators ang Pantawid Pasada card nga subsidy kuntani sang gobyerno para sa ila nga gatong.
Nahibaluan nga P20,500 ang ginahatag nga subsidy sang Pantawid Pasada Program sa kada unit sang jeepney para sa subong nga Enero tubtob Hunyo kag maga-release naman sang panibag-o nga pondo para sa bulan sang Hulyo tubtob Disyembre.
Suno kay Ortega, may siyam na ka mga drivers nga una nga nagreklamo sa Land Transportation Franchising and Regulatory Board (LTFRB) nga wala ginhatag sang ila mga operators ang ila nga pantawid pasada card.
Suno diri, nagpadala na ang LTFRB sang show cause order sa mga operators sang siyam ka mga drivers.
Pananglitan nga indi ang mga ini magpakita sa talatapan sang LTFRB, untaton ang ila nga prangkisa.
Nahibaluan nga ang Pantawid Pasada Card ang magamit lamang sa mga accredited gasoline stations kag indi ini pwede ma-encash.
Apang, palamangkutanon suno kay Ortega kun ngaa na-encash ini sang pila ka mga operators sa Land Bank.
Sa karon, plano nga magpadala ang SSTONE sang complaint letter sa LTFRB agud mahatag ini sang pagtamod.
