Sa karun nga panahon digital na kag nagatuluhaw na ang mga applications nga makapahapos sa atun kabuhi apang ini ang may yara man sang negatibo nga epekto sa sosyodad.
Kaangay lamang sang artificial intelligence ukon AI, nga tuman na ka lapnagon kag isa sa may dako nga nabulig sa pagpahapos sang trabaho, apang isa ka relasyon ang diutayan lang maguba bangud sa AI.
Sa China, isa ka pensionaire ang makigbulag na kuntani sa iya asawa bangud lamang sang AI.
Suno sa report, naluyag ang 75 anyos nga lalaki nga si Jiang sa AI-generated female avatar samtang naga-browse sa social media.
Nagwapahan sa iya si Jiang kag na-in love bisan pa nga wala nagasanto ang iya ginahambal sa buka sang iya bibig.
Sang ulihi, na-obsess na ini sa iya online girlfriend kag masami na ini nakatutok sa iya cellphone para sa bag-o nga generic message nagikan diri.
Isa ka adlaw, gin-akigan ini sang iya asawa bangud nga nawili nalang ini sa pag-uyat sang iya cellphone. Bangud sini, ginhambalan niya ang iya asawa nga magbulagay nalang sila agud nga mahatag niya ang tanan niya nga oras sa AI avatar.
Maayo lamang, ginpaathagan ini sang iya mga anak angot sa AI kag ang iya online girlfriend ang wala naga-eksister.
