BACOLOD CITY — Patay ang 81-anyos nga tigulang nga lalaki matapos nasunog ang ila balay sa Purok Hollow Blocks, Barangay Singcang, ciudad sang Bacolod kaina sang kaagahon.
Pasado ala 1:00 sang kaagahon sang ginlamon sang kalayo ang apat ka mga balay sa lugar kalakip na ang iya sang biktima nga si Edison Hojilla.
Sa interview sang Bombo Radyo Bacolod, ginpahayag sang anak sang biktima nga si Herson nga nakagwa na kuntani sa iya balay ang tigulang apang nagbalik pa ini sa kwarto.
Mahimo suno sa iya nga may kuhaon ini nga papeles bangud retirado ang biktima kag may ginabaton nga pension.
Nagtinguha pa kuntani ang iya mga himata nga ini ang salbaron apang indi na masarangan ang kainit bangud dako na ang sunog.
Sang nagpuas na ang kalayo, nasapwan ang amay nga Hojilla nga patay sa sulod sang iya kwarto.
Suno kay Herson, sa kusina sang balay sang iya amay nagsugod ang kalayo bangud ginapatihan nga magainit ini sang tubig.
Magluwas sa balay sang biktima, naupos man ang balay nanday Herson, Erlinda Aguilar kag Rica Aguilar.
