Paga-imbestigahan pa sang Department of Justice ang kredibilidad kag motibo sang anay pulis nga si Rodulfo Gracioso Jr. natuhoy sa iya mga alegasyon nga nag-deliver ini sang maleta nga may kwarta sa pamilya Duterte sa mando ni former Speaker Lord Allan Velasco.
Sa iya affidavit nga gina-usisa na sang departamento, ginpahayag nagdul-ong ini sang minaleta nga kwarta sa bise presidente, anay President Rodrigo Duterte, kag Davao City 1st District Representative Paolo Duterte.
Ginpanginwala naman ni VP Sara ang alegasyon kag nagpahayag nga indi niya kilala si Gracioso, kag wala siya nakabaton sang kwarta naggikan sa nasambit nga anay pulis.
Wala pa sang statement si Rep. Duterte kag former Presidente Duterte natuhoy diri.
Gin-deny man sang kampo ni Velasco ang mga alegasyon kag ginpahayag nga wala ini sang basehan.
Suno kay Justice Secretary Fredderick Vida, pagatun-an sang DOJ ang kabug-usan nga sirkumstansiya sang alegasyon.
