Pilason ang siyam ka bulan nga lapsag kag duha ka menor de edad matapos ma-involved sa aksidente sa National Road, Sitio Kalasag, Brgy Mansablay, Isabela Negros Occidental, sang Agosto 7, alas- 6:10 sang gab-i.
Sa inetrview sang Bombo Radyo kay PLt Idelfonso Leonardo, Deputy Chief of Police sang Isabela Municipal Police Station, nagabyahe padulong sa sur nga dereksyon ang motorsiklo nga ginamaneho ni Alenmar, 20 anyos, sakay ang iya live-in partner nga si Rudilyn, 18 kag ang siyam ka bulan nga lapsag.
Samtang, nagabyahe naman sa opposite nga dereksyon ang motorsiklo nga ginamaneho ni Gene Mark, 34 anyos, sakay sanday Rona, 36 anyos kag duha ka lalaki nga menor de edad.
Nadulaan sang control sang motorsiklo si Gene Mark kag naglapaw sa pihak nga lane kun sa diin nasugata sini ang motorsiklo.
Bangod sa impact, nag-angkon sang minor injuries ang mga driver kag mga sakay nila samtang si Rona nag-agom sang serious injury sa iya ulo kag iban pa nga bahin sang iya lawas kasubong man nga nag-angkon sang serious injury ang isa niya ka bata nga lalaki.
Gilayon naman nga gindala ang tanan nga biktima sa Ignacio Lacson Arroyo Memorial District Hospital para mahatagan sang nagakaigo nga pagbulong.
