90 ka volcanic earthquakes ang narekord sang Kanlaon Volcano Network, humalin sang Martes alas- 3:00 sang hapon tubtob alas 12:00 sang hapon, kahapon.
Kalabanan sa mga linog ang naggikan sa kadalumon nga 20 kilometers sa southeastern sector sang edifice kasubong man nga may lima ka tectonic events nga nagaresulta sang rock fracturing kag 85 naman ka mga low-frequency events ang narekord nga nagapakita nga may paggiho sa volcanic fluids.
Dugang pa, padayon nga nagasaka ang gas emission sang volcanic sulfur dioxide (SO2) humalin pa sang Hunyo 3, 2024 sang naglupok ang bulkan kun sa diin sa karun nagadangat sa kapin sa 3,254 tonnes/day ang gas emission kag kahapon nagdangat ini sa 5,083 tonnes/day.
Sa overall monitoring, nakita nga may magmatic process sa idalum sang bulkan nga nagatuga sang pagsaka sang volcanic earthquake activity kag high concentrations sang volcanic gas emission.
Ginapaandaman ang publiko nga nagapabalin sa Alert Level 2 ang bulkan Kanlaon dugang pa nga may magmatic process nga nagakatabo nga posible magresulta sa liwat nga paglupok sini.
Hugot nga gina-abisuhan ang publiko nga likawan ang pagsulod sa 4 kilometer-radius Permanent Danger Zone agud mapahagan-hagan ang risgo sang volcanic hazards kaangay sang pyroclastic density currents, ballistic projectiles, rockfall kag iban pa.
Kun may yara naman sang ash fall events, gina-abisuhan ang publiko nga koberan ang ilong kag baba sang malimpyo nga panyo ukon face mask.
Ginapaandaman man ang Civil aviation authorities nga likawan ang pagbyahe sa kahanginan malapit sa summit sang bulkan.
Kasubong man nga ginapahalong ang mga nagapuyo malapit sa river systems sa southern kag western slopes, ilabi na ang nag-eksperyensya sadto sang lahar kag muddy streamflows.
Padayon ang close monitoring sang DOST-PHIVOLCS sa Kanlaon Volcano kag nagpasalig sang gilayon nga koordinasyon basta may yara sang pagbag-o nga development sa status sang bulkan.
