90 tubtob 95 porsyento na sa mga manunudlo nga nagserbe sa May 12 Midterm Elections ang nakabatun na sang honoraria gikan sa Commission on Election.
Sa interview sang Bombo Radyo Bacolod kay RJ Paglumutan, deputy spokesperson sang Department of Education division of Bacolod City, nabatun na sang kalabanan nga mga manunudlo ang payout nakaligad nga semana.
Ang mga wala na lamang makabatun amo ang mga manunudlo nga nag-upod sa delegasyon sang Western Visayas para sa Palarong Pambansa 2025 sa Ilocos Norte.
Pasalig sini nga nakapreparar na ang tanan kag ang himuon na lamang sang mga manunudlo amo ang magpadulong sa Comelec.
Apang suno diri, wala pa magreflect ang dugang nga P1,000 sa honoraria.
Madumduman nga una gin-anunsyar sang Comelec ang adisyunal nga P2,000 nga gilayon man nga nalakip sa budget, samtang antes ang eleksyon nagpalagas naman sang anunsyo si President Ferdinand “Bongbong” Marcos para sa dugang nga P1,000 apang ini ang may mga paga-agyan pa nga proseso antes mapondohan.
Samtang para sa proseso sang eleksyon, aminado si Paglumutan nga kinahanglan nga ma-improve ang pag-akumodar sa elderly kag iban pa nga vulnerable sector.
Madumduman nga ang alas-5:00 sang aga tubtob alas-7:00 sang aga ang gintalana sa pagboto sang mga senior citizen, persons with disability kag pregnant women, apang ang duha ka oras ang kulabos gani nagagutok gihapon ang mga ini sa priority lane kadungan sa regular voters.
Samtang ginaduso man nila nga mabutangan sang police visibility sa polling places.
Ini bangod sa nakaligad nga eleksyon, ang mga kapulisan ang ginapahanugutan lamang 50 meters gikan sa polling centers.
Suhestyon man sini nga mabutangan sang comelec personnel ang mga information desk kag indi lamang mga deped personnel bangod ang mga ini ang mas may ihibalo sa proseso.
