BACOLOD CITY – Apisar mainit ang panahon sa estado sang Delaware, wala ini nakaapekto sa mga players sang Philippine team nga nagasabak sa Little League Seniors Division Softball World Series sa Estados Unidos.
Alas 8:00 kaina sang aga, nagsugod ang hampang sang Negros Occidental Little League seniors batok sa Garden City Softball Little League nagikan sa Missoula, Montana, USA nga tiglawas sang West region kag natapos ang match pasado alas 10:00 sang aga.
Wala man lang naka-score ang Montana team samtang may 10 points naman ang Philippine team nga tiglawas sang Asia-Pacific region.
Ini ang pinakamataas nga score nga nakuha sang pungsod humalin sa 1st game sadtong nakaligad nga adlaw sang Miyerkules.
Ang American team ang labing una nga kasumpong sang Pilipinas sa mga rehiyon nga miyembro sang Pool B sang torneyo.
Nahibaluan nga ang softball team nga nakabase sa Negros Occidental kag apat ka iban pa nga rehiyon ang miyembro sang Pool A.
Bangud sa pinakaulihi nga kadalag-an, uyat na sa karun sang pungsod ang 5 wins, 0 loss record kag maga-abanse ini sa iban pa gid nga matches tubtub nga makalab-ot sa championship round sa Lunes sang kaagahon.
Una na nga ginreport nga ginatangla kag ginakabig nga threat ang Philippine team sa mga rehiyon nga nagasabak sa World Series bangud ini ang labing una nga team nga naghampang sa Asia-Pacific Regional Softball Tournament nga uyat ang 6-straight win ukon wala sang kapierdihan sa anom ka sunod-sunod nga hampang.
