BACOLOD CITY — Dako ang epekto sang kamatayon sang top drug lord sa Western Visayas sa supply sang iligal nga druga nga nagasulod sa ciudad sang Bacolod kag probinsya sang Negros Occidental.
Ini ang pahayag ni Bacolod City Police Office Director Police Senior Superintendent Jack Wanky kasunod sang kamatayon ni Richard Prevendido sa distrito sang Jaro sa ciudad sang Iloilo sang Biyernes sang gab-i.
Suno kay Wanky, dako nga kadalag-an sa hanay sang kapulisan kag sang publiko ang pagkatultol sa ginapanaguan ni Prevendido kun sa diin natigayon ang pagserbe sang warrant of arrest kag nagluntad ang maduguon nga insidente.
Suno sa BCPO director, dako nga drug lord sa isla sang Panay si Prevendido kag may koneksyon ini sa ciudad sang Bacolod kag probinsya sang Negros Occidental.
Aminado si Wanky nga mas maayo kun nadakpan si Prevendido nga buhi bangud mahibaluan kun sanday sin-o ang nagahatag sa iya sang proteksyon apang ang importante suno sa iya nga na-neutralize ini.
Ginakabig naman ni Police Chief Superintendent Edmund Gonzales, director sang Police Regional Office 18, nga welcome news ang kamatayon sang drug lord.
Dako nga accomplishment sang Police Regional Office 6 suno sa iya ang pagkadakop kay Prevendido bangud madugay man ang ila pagtinguha antes natultulan ang ginahukmungan sini.
Aminado man si Gonzales nga dako ang epekto sini sa supply sang druga nga nagasulod sa Bacolod kag Negros Occidental nagikan sa isla sang Panay.
