BACOLOD CITY — Nagapasalamat ang presidente sang Association of Barangay Captains (ABC) sa probinsya sang Negros Occidental nga napirmahan na ni Presidente Rodrigo Duterte ang layi nga nagapaiway sang Barangay kag Sangguniang Kabataan (SK) elections.
Ini matapos nga ginpirmahan ni Presidente Rodrigo Duterte ang Republic Act 10953 nga nagapostpone sang Barangay kag SK elections sa Mayo 2018.
Dako ang pagpasalamat ni Board Member Annabelle Bermudo sa nangin tikang sang presidente bangud nga nadula na ang makahalawat-hawat nga pamatyagan samtang nagahulat sang desisyon sang presidente.
Apang suno diri, kun madayon gid man ang eleksyon, preparado naman sila nga magfile sang Certificate of Candidacy (COC) nga gintalana kuntani subong nga adlaw.
Bentaha naman suno kay Bermudo para sa ila nga mga incumbent officials ang pagpaiway sang eleksyon sini nga tuig bangud nga mapadayon pa nila ang ila mga wala natapos nga programa subong man ang kampanya kontra iligal nga druga.
Samtang, nagalaom ang bise gobernador sang probinsya sang Negros Occidental nga ini na ang ulihi nga postponement sang Baranggay kag Sangguniang Kabataan (SK) elections.
Suno kay Lacson, madamo na nga mga politiko ang nagakalangkag para sa eleksyon kag nagakadapat nga madayon na gid ini sa madason nga tuig.
Samtang nagalaom man ini nga ang postponement sini nga tuig ang mangin pasimuno sang pagpaiway man sang 2019 nga eleksiyon.
Nagapanugyan naman si Vice Gov. Lacson sa mga incumbent barangay officials nga padayon nga magserbisyo sang maayo sa ila mga nasakupan.
Importante man suno diri ang pagpatigayon sang Baranggay Day kun sa diin mahimo mapalab-ot sang mga pumuluyo sa opisyal sang baranggay ang ila nga mga sentimyento.
Suno sa bise gobernador, ang sekreto sa re-election amo ang maayo nga pag serbisyo sa pumuluyo.
