Ginsaylo na sa headquarters sang Negros Occidental Police Provincial Office (NOPPO) ang siyam sa onse ka mga ginapahayag miyembro sang New People’s Army (NPA) nga nadakpan sa tunga sang engkwentro sang militar kag sang rebelde nga grupo sa Barangay Quintin Remo, Moises Padilla sang nagligad nga Lunes.
Sa interview sang Bombo Radyo Bacolod kay Police Captain Junjie Liba, hepe sang Moises Padilla Municipal Police Station, temporaryo anay nga ikustodiya ang siyam ka mga persona sa Criminal Investigation and Detection Group (CIDG).
Ini ang kasunod sang pila ka mga impormasyon nga ila nabaton nga nagaplano nga sudlon sang mga miyembro sang rebelde nga grupo ang Moises Padilla Municipal Police Station.
Samtang, ginkumpirmar man ni Liba nga ang duha ka mga menor de edad ang ginbalik na sa kustodiya sang ila mga ginikanan.
Suno pa sa hepe nga medyo malinong na karon ang nasambit nga banwa apang wala sila sa gihapon nagapakampante sa posibilidad nga mag-atake liwat ang mga NPA.
Kun madumduman nga ginapatihan nga may kaangtanan ang mga onse ka mga nagkaladakpan sa kamatayon ni Councilor Jolomar Hilario nga ginluthang sa sulod mismo sang ila balay sa Barangay Inolingan sang tinalikdan nga Domingo sang aga.
Date of airing: April 5, 2019
