Naisol naman ang delivery sang mga school supplies nga ginbakal sang Bacolod City Government agud ipanagtag sa public elementary students sa siyudad.
Sa interview sang Bombo Radyo Bacolod kay Executive Assistant to the Mayor Moises Dela Cruz, ginpahayag sini nga indi matapos ang bulan sang Nobyembre kag madeliver na sang supplier ang mga school supplies.
Sang tinalikdan nga interview, ginpahayag ni Dela Cruz nga bulan sang Oktubre ang schedule sang delivery.
Paathag sini, wala ginbaton sang General Services Office ang mga school supplies nga una nga nag-abot bangud indi ini kompleto.
Luyag sang City Government suno kay Dela Cruz nga tingub ang delivery agud indi mabudlay ang pag-isipay.
Gin-ako sang executive assistant nga wala ini sang ideya kun ngaa indi kompleto ang gindeliver apang ginpasalig sini nga madeliver ang mga school supplies antes matapos ang bulan sang Nobyembre.
Suno kay Dela Cruz, himuon nalang ni Mayor Evelio Leonardia nga regalo sa mga kabataan sa Disyembre ang mga school supplies.
Santo sa kontrata, may yara sang 60 ka adlaw ang supplier agud mahatag ang mga items.
