120 mil pesos nga balor sang suspected shabu ang nakumpiskar sa buybust operation nga ginpatigayon sa Barangay Mambulac, Silay City kahapon sang hapon.
Ginkilala ang subject sa operasyon nga si Richard Valenzuela, 40-anyos kag residente sang nasambit nga lugar.
Sa interview sang Bombo Radyo Bacolod kay P/ Major Rollie Pondevilla, hepe sang Silay City Police Station, ginakabig nga high-value target personality si Valenzuela kag yara ini sa target list.
Suno kay Pondevilla, natigayon nga makuha sa possession sang suspetsado ang apat ka mga medium plastic sachet sang suspected shabu kag lima ka mga magagmay nga sachet sang ginasuspetsuhan iligal nga druga.
Ginabanta nga nagabug-at sang 8 grams ang narekober nga mga shabu.
Gin-ako man sang suspetsado nga si Michael Divinagracia ang supplier sini sang iligal nga druga.
Suno pa sa hepe, may yara sang tattoo ni Divinagracia ang lawas ni Valenzuela.
Sa karon, nakahunong ini sa Silay City Police Station kag natalana nga pasakaan sang kaso sa pagbayolar sang Sec. 5, 11 kag 12 sang Republic Act 9165 ukon Comprehensive Dangerous Drugs Act of 2002.
