Nagahulat-hulat na sang pagpanagtag sang Christmas bonus ang mga nagabaligya sang lanterns sa Dalan Burgos, ciudad sang Bacolod agud mangin mabakal ang ila baligya.
Sa interview sang Bombo Radyo Bacolod kay Manang Tata sang Brgy. Caliban, Murcia, Oktubre 29 sila nagsugod baligya sang Christmas lanterns sa lugar nga ila naman ginakuha sa Negros Occidental District Jail.
Suno diri, halin alas-7:00 sang aga tubtob alas-12:00 sang gab-i ang ila pag-display sang lanterns sa lugar.
Sarang makabakal sang lanterns nga tag-P300 samtang P500 naman ang pinakamahal.
Suno pa kay Manang Tata, may diutay man nga pagsaka ang ila presyo subong bangud nagmahal man ang mga materyal kun sa diin nagligad nga tuig ang P500 subong ang sarang lang mabakal sa 400 pesos.
May yara naman sang nagabakal sa ila display apang suno kay Manang Tata nagadamo gid ang baklanay kun makapanagtag na sang Christmas bonus ang mga employers.
Tubtob pa sa Disyembre 24 ang pagbaligya sang mga ini sa Dalan Burgos.
Nahisayran man diri, nga sarang gid makapa-customize sa ila sang lanters kag subong man makapa-repair.
