Nagaamat-amat na nubo ang kaso sang probable kag suspected coronavirus disease 2019 (COVID-19) sa probinsya.
Sa interview sang Bombo Radyo Bacolod kay Dr. Jessica Fama, assistant head sang Provincial Health Office, iya ginpahayag nga may yara na lamang sa karon sang 20 ka mga suspected COVID-19 patients ukon ang mga persons under investigation sa probinsya kag 453 probable COVID-19 patients ukon ang mga persons under monitoring.
Suno kay Fama, napulo na lang ka mga local government units ang may yara sang suspected cases.
Ini ang ginalakipan sang Calatrava kag La Castella nga may tag-apat; San Carlos nga may tatlo; tag-duha sa EB Magalona kag Valladolid; kag tag-isa naman ka suspected case sa Cadiz, Cauayan, Ilog, La Carlota, kag San Enrique.
Samtang, may yara na sang lima ka mga LGUs sa probinsya ang wala sang may narekord nga probable case sa COVID-19.
Ini ang ginalakipan sang Binalbagan, Candoni, Cauayan, Isabela kag Valladolid.
Nagapasalamat gid sa Fama sa tanan nga mga LGUs, local health offices kag mga Barangay Health Emergency Response Teams (BHERTS) nga adlaw-adlaw nagamonitor sa mga ini.
Nahibaluan nga nagpeak ang mga COVID probable cases sadtong Marso 26 nga may yara sang 10,286 ka mga kaso samtang nagpeak naman ang mga COVID suspected cases sang Marso 27 nga may yara sang 118 ka mga kaso.
