Ginkumpirmar ni Bacolod City Mayor Evelio “Bing” Leonardia nga magapabilin ang enhanced community quarantine (ECQ) sa ciudad tubtob sa Abril 30.
Sa exclusive interview sang Bombo Radyo Bacolod sa alkalde, ginpahayag sini nga ila ginakonsiderar nga may yara pa sang pending swab test result nga wala makaabot nagikan sa laboratory center sa Iloilo.
Suno diri, wala pa sang kasiguraduhan nga wala na sang may madugang sa pito ka mga nauna nga COVID-19 cases nga narekor sa Bacolod kun sa diin lima na ang nakarecover matapos nagnegatibo sa repeat test, isa ang nagapabilin sa ospital apang negatibo naman sa balatian kag isa ang nagtaliwan antes pa man ang resulta sini.
Dugang pa sang alkalde, may yara pa sang tatlo ka mga suspected patients nga nagtaliwan na kag wala pa nakaabot ang swab test result sang mga ini.
Iya naman ginapatumod sa City Health Office ang mga barangay sang tatlo ka nagtaliwan agud nga mamonitor ang lugar.
Suno pa kay Leonardia, apisar nga wala pa sang resulta, dapat nga ilockdown ang mga lugar sang mga ini bangud nga indi masiguro kun positibo sila ukon indi sa balatian.
Gin-athag man sini nga indi niya pag-idowngrade ukon imodify ang ECQ kaangay sa ginhimo sa probinsya bangud suno kay Leonardia, lain-lain man ang sitwasyon kag sirkumstansya sa kada lugar.
