Ginkumpirmar sang alkalde sang banwa sang La Castellana kagab-i nga may yara sang isa ka residente nga nagpositibo sa coronavirus disease (COVOD-19).
Ini ang nareport nga ika-duha nga nagpositibo sa balatian sa Negros Occidental.
Ang nasambit nga pasyente ang isa ka 43-anyos nga lalaki nagikan sa Barangay Nato, La Castellana.
Naka-close contact ini kanday WV 37 kag WV 38 nga lunsay mag-asawa nagikan sa Pavia, Iloilo bangud naga-trabaho ini siya didto bilang driver.
Sa interview sang Bombo Radyo kay Mayor Rhumyla Nicor-Mangilimutan, kagab-i lang nagwa ang resulta sang swab test sini nga ginkuha sang Abril 12 kag ginpadala sang Abril 13.
Suno kay Mangilimutan, matapos mabaton ang resulta, gilayon ini nga nagconvene sa Inter-Agency Task Force Against Coronavirus sang banwa kaupod ang pila ka mga ahensya.
Nagpagwa man ini sang Executive Order nga nagapaidalum sang Brgy. Nato sa Extreme Community Quarantine samtang nagapabilin naman sa Enhanced Community Quarantine (ECQ) apang ginadumilian ang pagbyahe sang mga tricycle, trisikad kag e-bike.
Gindugang man sini nga i-isolate man ang nasambit nga barangay kag nagrequest ini sang reinforcement agud madugangan ang mga kapulisan.
Suno sa alkalde, nakasugod naman sila contact tracing kag ginrekomendar sini nga probinsya nga ipaidalum sa swab test ang mga may close contact sa pasyente.
Nagpasalig man si Mangilimutan nga wala sang dapat kahangaw-an ang mga pumuluyo bangud walo na ka adlaw nga yara sa estable nga kondisyon ang pasyente kag nagnegatibo man ang pamilya sini.
Nagpanawagan man ini sang kooperasyon sang mga pumuluyo nga magbinuligay, mangin disiplinado kag mangamuyo agud magtahaw na ang virus. Samtang,
Magapadulong subong nga adlaw ang team sang Provincial Health Office sa banwa sang La Castellana agud nga magpatigayon sang rapid testing kag magkuha sang 50 ka mga swab samples sa naka-close contact sa ikaduha nga COVID patient sa Negros Occidental.
Nahibaluan nga kagab-i, ginkumpirmar nga may yara sang narekord nga ika-duha nga nagpositibo sa balatian sa probinsya.
Isa ini ka 43-anyos nga lalaki nagikan sa Barangay Nato, La Castellana.
Naka-close contact ini kanday WV 37 kag WV 38 nga lunsay mag-asawa nagikan sa Pavia, Iloilo bangud naga-trabaho ini siya didto bilang driver.
Sa interview sang Bombo Radyo Bacolod kay Provincial Administrator Atty. Rayfrando Diaz, ginpahayag sini nga ila nadesisyunan nga ipaidalom gilayon sa lockdown ang lugar sang nasambit nga pasyente.
Suno ka Diaz, nag-abot sa probinsya si Patient No. 2 sadtong Marso 13 nagikan sa Pavia, Iloilo.
Gilayon ini nga ginpaidalom sa home quarantine tubtob sang Marso 28 kag wala man sang may ginpakita nga sintomas.
Abril 5 kag 6 sang nakabatyag na ini sang sintomas kaangay sang hilanat kag LBM apang ginpawalaan niya lamang ini.
Abril 5 sang nagpositibo sa balatian ang iya employer sa Iloilo apang Abril 8 na sang ginpahibalo siya nga positibo ang iya mga amo sa virus.
Abril 11 sang nagdesisyon ini nga pahibaluon ang LGU sang La Castellana.
Gilayon ini nga gin-quarantine sa quarantine facility sang banwa.
Abril 12 sang ginkuhaan siya sang swab kag Abril 13 sang ginpadala ini sa Iloilo.
Kahapon, Abril 20 sang naggwa ang resulta nga positibo siya sa COVID-19.
Ginpaidalom man sa testing ang asawa kag bata sini apang lunsay nagnegatibo sa balatian.
Suno kay Diaz, madamo gid nga natun-an ang probinsya sa na-eksperyensyahan sang nasambit nga pasyente kag mahimo gid nila ini mausar sa pag-manage sang iban nga mga kaso sa palaabuton.
