Nalipay si Bacolod City Mayor Evelio “Bing” Leonardia sa kumpirmasyon nga sumugod Abril 2 tubtob Abril 19, madamo ang nagnegatibo sa COVID test kag ang ulihi nga nagpositibo ang narekord sang Abril 2 pa.
Apisar nga sunod-sunod ang negatibo nga resulta sa sulod sang tatlo ka semana kag nalipay ini, ginapahanumdom gihapon sang alkalde nga may mga nabilin pa nga ginahulat ang resulta.
Dugang pa nga may mga iban nga nagtaliwan na nga nagasuprer sang sintomas sang balatian ang wala makuhaan sang swab sample test gani indi pa sarang makasiguro nga wala sang iban pa nga nalatnan.
Suno pa diri, sumugod sang una nga test sadtong Pebrero, 286 na ang total nga napaidalum sa test, 162 ang nagnegatibo, pito ang positibo kag 117 ang nabilin pa nga ginahulat ang resulta.
Nahanungod naman sa mga luyag magbalik sa probinsya, ginaklaro ni Leonardia nga pagatun-an nila ini sang maayo.
Suno sa chief executive, maayo nga makapauli ang mga pumuluyo apang para sa seguridad sang siyudad, nagapatigayon man ini sang limitasyon sa mga maga-abot halin sa Manila.
Samtang, ginakabig nga madinalag-on ang una nga Sunday lockdown nga ginpatuman sa ciudad sang Bacolod.
Sa video conference nga ginpatigayon ni Bacolod City Mayor Evelio “Bing” Leonardia, nagapasalamat ini sa pagbuylog kag kooperasyon sang tanan sa nasambit nga mando nga ginadumilian ang pag-gwa sang tanan lakip na ang mga may yara sang home quarantine pass (HQP) sa adlaw sang Domingo.
Nahibaluan nga ang mga essential workers kag frontliners gid lamang ang mahimo makagwa sa ila mga panimalay sa nasambit nga adlaw.
Ginadayaw man sang alkalde ang mga barangay officials nga hugot sa pagpatuman sang polisa agud malikawan na ang paglapta sang coronavirus disease 20149 (COVID-19).
Suno kay Leonardia, masobra duha ka semana na nga wala sang may narekord nga nagpositibo sa balatian sa Bacolod.
Gani ginahimo sini ang tanan agud nga matapna na ang virus.
Apang, ginkumpirmar naman sini nga may yara pa sang 117 ka mga swab results nga naka-pending karon.
Sa kabug-usan, 286 ka mga swabs ang ginpadala sang ciudad kun sa diin 162 diri ang nagnegatibo kag pito ang nagpositibo.
