Gilayon man nga nagpatigayon sang contact tracing ang opisyales sang Barangay Estefania, ciudad sang Bacolod matapos mahibaluan nga naghapit sa balay sang iya utod ang driver nga tumandok sang Barangay Nato, La Castellana nga nagpositibo sa COVID 19.
Sa interview sang Bombo Radyo Bacolod kay Punong Barangay Jerry Tingson, na-locate na sini ang pamilya kag gin-abisuhan nga maghome quarantine sa sulod sang 14 ka adlaw apisar sang Marso 13 pa nagpaligad sang gab-i ang nagpositibo sa balatian.
Ang barangay naman ang bahala nga magprovide sang kinahanglanon sini bangud indi ang mga ini makagwa agud magbakal.
Ginpahayag man ni Tingson nga nagakooperar ang mga ini sa barangay officials.
Ginabantayan man sini kun may nalatnan nga pumuluyo sa Barangay Estefania.
Nagcoordinate man ini sa Inter-Agency Task Force Against Coronavirus 2019 nga ginapangunahan ni Vice Mayor El Cid Familiaran sa tikang nga nahimo na sini.
Antes pa man sini gin-abisuhan nga magpaidalom sa home quarantine ang pamilya, ginpakadtuan niya ini agud mavalidate.
Ginhatagan man sila sang mga protective gear kag facemasks agud masiguro nga maproteheran ang mga ini.
Nagpanugyan man ini sa mga pumuluyo nga magpabilin sa tagsa ka panimalay.
Samtang, ginkalipay man ni Vice Mayor El Cid Familiaran ang gilayon nga paghimo sang tikang ni Tingson agud matumod kag mapaidalom sa home quarantine sa sulod sang 14 ka adlaw ang pamilya sang driver.
Ginakabig man nga persons under investigation (PUI) ang tanan nga mga utod sang nagpositibo.
Ginkompirmar man sini nga magluwas sa Brgy. Estefania, nagpasugat man ang biktima sa utod sini sa Purok Bulak, Brgy. Mandalagan, Bacolod City.
Nakuhaan naman sang SWAB sample sang City Health Office ang mga utod nga naclose contact sang pasyente.
