Gin-athag ni Negros Occidental Governor Eugenio Jose “Bong” Lacson nga two-day lockdown lang ang matabo sa kada local government units (LGUs) kadungan sa pagpatigayon sang mass testing.
Nahibaluan nga nahisugtan sang provincial government kag Bacolod City government nga magpatuman sang “time-out weekend” sumugod sa Agosto 28 tubtob Agosto 31.
Ang ciudad sang Bacolod ang una nga magapatigayon sang mass testing sa kapin 5 mil ka mga symptomatic COVID-19 patients sa Agosto 28-29 samtang 5 mil man ang iga-test sa mga ciudad sang Talisay, Silay, Bago kag banwa sang Murcia Agosto 30-31.
Sa exclusive interview sang Bombo Radyo Bacolod kay Lacson, ginpahayag sini nga bangud sa nagadamo nga local cases sang coronavirus, tinutuyo sang pag-lockdown sa sulod sang duha ka adlaw sa tagsa ka LGU ang agud mapangita kag ma-test ang mga symptomatic patients ukon mga persona nga nagapakita sang flu-like symptoms kag senyales sang COVID-19.
Dugang pa sang gobernador nga ang Barangay Health Emergency Response Teams (BHERTs) ang magapangita sa mga symptomatic patients.
Ginalauman naman sini nga may yara sang kabudlayan nga matabo ilabi na sa una nga adlaw sang pagpatuman sang time-out weekend apang nagapati ini nga mangin madinalag-on ang tikang nga pagahimuon agud matapna ang local transmission sa probinsya sang Negros Occidental subong man sa ciudad sang Bacolod.
