Ginalantaw ni Executive Assistant to the Mayor kag cluster head sang City Disaster Risk Reduction and Management Office (CDRRMO) Joemarie Vargas nga magalab-ot pa sa tatlo ka semana ang pagpangkalkal kag pagpanghakot sang basura sa Mambuloc Creek nga sakop sang Barangay 8 kag Barangay 2 sa ciudad sang Bacolod.
Madumduman nga kahapon, nagsugod na sa sang massive excavation kag dredging operations sa Mambuloc Creek ang Mambuloc Clearing Team gamit ang bag-o nga Hidromek Amphibious Excavator sang ciudad nga nagabalor sang P28 million.
Ang amo nga pondo ang nagikan sa 2019 fund sang city government kag sang nagligad lang nga 2020 nag-abot.
Sa interview sang Bombo Radyo Bacolod kay Vargas, ginpahayag sini nga ila ginabanta nga magalab-ot sa 100 ka truck ang ila mahakot nga basura nagikan sa Mambuloc Creek.
Suno sa iya, pamalahon nila anay ang basura antes ihaboy sa dumping site.
Dugang pa sini nga prayoridad nila ang Mambuloc Creek bangud ini ang nagatuga gid sang pagbaha sa ciudad.
