Nagapadayon pa ang imbestigasyon kag hot pursuit operations sang Bacolod Police Station 1 tuhoy sa pagluthang patay sa isa ka NBI asset ang mga suspetsado nga nagasakay sa pula nga SUV sa Purok Malalusan, Barangay 32, Bacolod City kahapon sang aga.
Ginkilala ang biktima kay Ramie Cientos, 62-anyos kag residente sang Barangay 29, Bacolod City.
Sa pahayag sang witness kag tupad balay ni Cientos nga si Alyas Lagpok, nagatambay sa isa ka tyangge ang biktima sang gintiro ini sang wala makilal-an nga mga suspetsado sakay sa pula nga Toyota Innova.
Pagkabati sang kaingod sang una nga lupok, nagdalagan ini agud pabal-on ang asawa ni Cientos apang sunod sunod na dayun nga lupok ang iya nabatian.
Gilayon nga ginbawian sang kabuhi ang biktima matapos ini mag-angkon sang madamo nga igo sang bala sa lawas.
Samtang, madasig naman nga nagpalagyo ang mga suspetsado sa wala mahibaluan nga direksyon.
Sa interview sang Bombo Radyo kay Police Major Ramel Sarona, officer-in-charge sang Bacolod Police Station 1, ginpahayag sini nga ila pa tsekyaron kun may kaangtanan ang biktima sa illegal nga druga subong man sa iban nga mga estasyon.
Ila man igareview ang CCTV agud matrace ang salakyan sang mga suspetsado kag iconfirm kun asset gid man siya sang NBI.
Nagalaom si Sarona nga ila makit-an ang cellphone sang biktima nga ginaalegar gindala sang mga suspetsado bangud posible nga may importante didto nga mga impormasyon.
Nagahilibiun naman ang asawa sang ni Ramie nga si Nancy Cientos samtang ginasaysay ang natabo sa iya nga bana.
Suno kay Cientos, maayo gid nga asawa kag amay si Ramie.
Sang una, suno sa iya, nagabarter trade ini sa Zamboanga kag nagaupod-upod sa iya mga kilala nga mga pulis apang sa karun, nagaupod na siya sa kay Mr. Gabriel nga nagaubra sa NBI.
Suno sa iya, naga-asset ang iya bana humalin pa sang nagligad tuig kag wala man nagapalarehas ang ginapaubra sa iya.
Suno diri, wala man sang may nabaton nga pagpamahog si Ramie kag wala man ini masyado nagaistorya tuhoy sa iya ubra.
