Ginpasalig sang pinuno sang Bacolod City Police Office nga mapatuman sang random checkpoint sa syudad agud nga matsekyar ang mga nagasulod kag nagagwa nga salakyan kag malikawan man nga matabo ang krimen kaangay sang natabo nga pagpanghold up kahapon sa Barangay Tangub, Bacolod City nga nagresulta sa kamatayon sang isa ka babayi.
Sa interview sang Bombo Radyo Bacolod kay Police Col. Manuel Placido, pagdugang sang police visibility kag pagpatuman sang random checkpoint ang tikang nga pagahimuon sang BCPO kasunod sang natabo nga pangpanghold-up kahapon.
Madumduman nga ginpahayag ni Police Major Joery Puerto, hepe sang Bacolod Police Station 8, nga yara sa atubang sang Medical Plaza sa BS Aquino Drive pasado alas-7:00 sang aga ang biktima nga si Angelica Montalvo, 23 anyos kaupod ang iya anay kahagugma nga amu ang nagadrive sang salakyan nga si Mark Carson Epsilon, 40 anyos, kag ang iya tiya kag pakaisa nga babaye sang hinali lang nga may nagpalapit ang lalaki nga nakamask kag nagdeklarar sang hold-up.
Nagpadulong sila sa Barangay Cabug apang pag-abot sa Barangay Tangub, gintiro sang suspetsado ang ulo sang biktima.
