Nagbalik na ang operasyon sang Transcom Bacolod subong nga adlaw matapos nga ginpauntat sang city government sa sulod sang 48 ka oras para sa disinfection.
Madumduman nga nagpatuman sang 48 -hour lockdown sang tinalikdan nga adlaw sa Transcom Bacolod sa Barangay Tangub agud magpatigayon sang disinfection matapos nga nagpositibo sa COVID-19 ang 41 ka mga empleyado.
Nagsugod ang monitoring sa nasambit nga BPO company sang Enero 23 matapos magpositibo ang isa ka 21 anyos nga lalaki nga empleyado nga residente sang Barangay Bata, Bacolod City.
Ini ang nagasuprer sang hilanat kag ubo.
Matapos ang contact tracing, duha pa ka mga empleyado ang nagpositibo man sa kaangay nga adlaw.
Sang Enero 25 kag Enero 26, nakarekord sang tag-isa ka mga positibo nga kaso; nadugangan ini sang duha sang Enero 27; kag pito naman sang Enero 29.
Bangud diri, nagpatigayon sang surveillance test sa kapin 594 ka mga empleyado sa nasambit nga kompaniya sang Enero 29 kag 30.
Sa nasambit nga numero, 27 diri ang nagpositibo gani nagdangat sa 41 ang kabug-usan nga numero.
Samtang, ginpahayag man ni Barangay Kagawad Pendon nga may yara sang apat ka mga nagatrabaho sa nasambit nga BPO nga nagapuyo sa Barangay Tangub nga nagpositibo sa COVID-19.
