Nagpasalig ang assistant regional director sang Bureau of Jail Management and Penology (BJMP) Region 6 sa publiko nga hugot nila nga gina-implementar ang mga security measures batok sa illegal nga druga.
Ini matapos maaresto ang anay miyembro sang BJMP sa drug buybust operation nga ginpatigayon sang Philippine Drug Enforcement Agency sa Henrieta Subdivision sa Barangay Singcang Bacolod City sang Miyerkules sang gab-i.
Ginkilala ang suspetsado kay Trisha Castillo Galicia kag residente sang Barangay Handumanan, Bacolod City.
Nakuha sa paghinakop sini ang lima tanan ka sachets sang suspected shabu nga ginabanta nagabug-at sang 25 gramos kag nagabalor sang P170,000.
Sa interview sang Bombo Radyo kay Senior Supt. Gilbert Peremne, ginpahayag sini nagdugay man sang napulo ka tuig sa serbisyo si Galicia kag sang Oktubre 2019, gin-assign ini kuntani sa regional office nagikan diri sa Negros Occidental para monitoring kag verification purposes bangud nalakip ini sa ila ginalantaw nga imbolbado sa illegal nga druga apang wala ini nagreport sa regional office.
Madamo man nga mga tikang kag malawig man nga tion ang ila ginhatag para sa iya apang wala gid siya nagpakita gani ginhukas ini sa serbisyo.
Luyag man sini ipaathag nga ang suspetsado ang indi na sa karun konektado sa BJMP.
Nagagwa sa monitoring sang PDEA nga si Galicia ang miyembro sang Jovy Vargas Drug Group nga anay personnel man sa BJMP.
Apisar sini nagpasalig ang assistant regional director nga hugot nila nga gina-implementar ang mga security measures kag regular nga nagapatigayon sang surprise drug test samga personnel.
Suno sa iya, sa 38 ka mga jail facilities, 28 na ang nadeklarar nga drug cleared kag ila sa karun ginatungahaan nga macertify man ang nabilin nga napulo.
