Duha na ka personnel sang Negros Occidental Police Provincial Office (NOCPPO) ang nagpositibo sa iligal nga droga sa ginpatigayon nga random drug test sa mga katapo sang kapulisan.
Suno kay P/Lt. Abegael Donasco, Deputy Spokesperson sang NOCPPO, ang ginapatigayon nga random drug test ang santo sa mando ni P/Brig. Gen. Rolando Miranda ang Regional Director sa Police Provincial Office (PRO) 6.
Madumduman nga nagpositibo ang isa ka Police Corporal gikan sa Candoni Municipal Police Station sang una nga semana sang Enero sa ginpatigayon nga random drug test.
Suno kay Donasco, liwat nga nagpatigayon sang random drug test ang NOCPPO sa 33 ka mga PNP personnel sang Enero 30 kun sa diin nagpositibo ang isa ka pulis.
Matapos sang pagpositibo sa drug test sa headquarters, ginpaidalum ini sa confirmatory test sa Philippine Drug Enforcement Agency kag positibo gihapon ang resulta.
Ang nagpositibo ang may ranggo nga P/Chief Master Sgt, apang wala na ginhingadlan kag ginpahibalo ang estasyon kun sa diin ini na-assign.
Sa karun yara na ini sa Provincial Headquarters kag ginadumilian sa paggwa kadungan sa pagsurrender sang armas sini.
Ginhatagan naman ang personnel sang 15 ka adlaw agud nga icontest ukon ichallenge ang resulta sang drug test pinaagi sa pagpatest sang gingamit nga urine sa pribado nga sektor kag wala ginapanag-iyahan sang gobyerno.
Matapos sini, igaforward naman ang pulis sa Regional Headquarters sa Iloilo.
Iga-assign ini sa Regional Personnel Holding Accounting Unit (RPHAU) kag didto na tan-awon kun magapadayon ang kaso.
Igasylo naman ang juricdiction sa kaso sang PNP personnel sa Regional Internal Affairs Services (RIAS) nga magalantaw sang kaso tubtob sa mafile ang kaso nga administratibo.
