Nagdangat na sa tatlo ang aktibo nga kaso sang COVID-19 sa hanay sang mga pulis sa Negros Occidental Police Provincial Office (NOCPPO) matapos madugangan sang isa.
Sa interview sang Bombo Radyo Bacolod kay P/Lt. Abegael Donasco, deputy spokesperson sang NOCPPO, ginpahayag sini nga ang amo nga personnel ang isa ka 47-anyos nga lalaki kag isa ka Police Chief Master Sergeant.
Asymptomatic ini kag wala man sang travel history.
Padayon siya karon nga nagapaayo sa healing facility humalin sang nagpositibo siya sang Enero 27.
Suno kay Donasco naka-quarantine naman ang tanan nga closed contacts sang amo nga personnel.
Dugang pa sini nga nagdangat na sa kabug-usan nga 41 ka mga pulis sa probinsya ang nagpositibo sa balatian kun sa diin 38 na ang nag-alayo kag nagapabilin sa tatlo ang aktibo.
Ginkumpirmar man ni Donasco nga lunsay negatibo ang anom ka batch ukon 150 ka NOCPPO personnel nga na-assign sa headquarters nga ginpaidalom sa swab testing.
